بازدار له‌مباره‌یه‌وه‌ وتوویه‌تی‌ په‌ره‌پێدانی‌ پیشه‌سازی‌ و له‌ناو بردنی‌ له‌وه‌ڕگه‌ و دارستانه‌کان و بڕینه‌وه‌ی‌ دار و ئاگر که‌وتنه‌وه‌ی‌ به‌رده‌وام له‌ دارستانه‌کانی‌ ئیلام له‌ هۆکاره‌کانی‌ له‌ناو چوونی‌ ژینگه‌ و په‌ره‌ سه‌ندنی‌ بیابان و شۆره‌کات له‌ ناوچه‌که‌یه‌.

ئه‌و ده‌ڵێت یه‌کێک له‌ رێگه‌ چاره‌کانی‌ به‌رته‌سک کردنه‌وه‌ی‌ په‌ره‌ سه‌ندنی‌ بیابان و بووژاندنه‌وه‌ی‌ دارستان و له‌وه‌ڕگه‌کانی‌ ئیلام، ناشتنی‌ نه‌مام و پاراستنی‌ ئه‌و ناوچانه‌یه‌ له‌ ده‌ستدرێژی‌.

ئه‌م به‌رپرسه‌ی‌ ده‌وڵه‌تی‌ ئێران له‌ کوردستان پێشتریش له‌ سه‌ره‌تاکانی‌ مانگی‌ سه‌رماوه‌زی‌ رابردوو وتبووی‌ زیاتر له‌ ۱۴۰ هه‌زار هێکتار له‌ زه‌ویه‌کانی‌ ناوچه‌ی‌ ئیلام له‌ شاری‌ دێلوران له‌ پرۆسه‌ی‌ به‌ بیابان بووندان.

هه‌ر ئه‌وکات بازدار رایگه‌یاندبوو که‌ خێرایی‌ گه‌شه‌ی‌ بیابان و شۆره‌کات له‌و ناوچه‌یه‌ به‌ راده‌یه‌که‌ که‌ شاره‌کانی‌ دێلوران و مێهران و ئابدانان به‌مجۆره‌ له‌ داهاتوودا ده‌بن به‌ بیابان.

به‌پێی‌ ئاماری‌ ئه‌م به‌رپرسه‌، هه‌موو ساڵێک زیاتر له‌ ۴۷ ملیۆن تۆن خۆڵی‌ به‌پیت له‌م ناوچه‌یه‌ی‌ کوردستانه‌وه‌ به‌هۆی‌ نه‌بوونی‌ سه‌د و ئاوبه‌ند، ده‌شۆرێته‌وه‌ و ده‌بێته‌ هۆی‌ رووتانه‌وه‌ی‌ زه‌وی‌ و بێ‌توانا بوونی‌ خاک و په‌ره‌ سه‌ندنی‌ بیابان و شۆره‌کات.

جیا له‌م هۆکارانه‌، ئاگر تێبه‌ر بوونی‌ به‌رده‌وامی‌ دارستانه‌کانی‌ ناوچه‌ی‌ ئیلام و شاره‌کانی‌ سه‌ر به‌م ناوه‌نده‌ به‌تایبه‌ت له‌ ماوه‌ی‌ هاوینی‌ رابردوودا و که‌مته‌رخه‌میی‌ ناوه‌نده‌ ده‌وڵه‌تیه‌کان و بێ‌ ده‌سه‌ڵاتیی‌ خه‌ڵک بۆ کۆنترۆڵ‌ کردنی‌ ئه‌م ئاگرانه‌، به‌شێکی‌ زۆر له‌ دارستان و ژینگه‌ی‌ ناوچه‌که‌ی‌ وێران کرد.