حاجى ئەحمدى لەمیانەى بەرنامەیەکى کەناڵى نەورۆز تیڤى وتى “بۆچى هەموو دنیا لەگەڵ ئەمریکا و ئیسرائیل پەیوەندییان هەیە ئێمەش مافى خۆمانە پەیوەندیمان هەبێت لەگەڵ ئەمریکا و ئیسرائیل”.

ئه‌وه‌شى خسته‌ڕوو که‌ ئه‌وان خاڵى هاوبەشیان هەیە لەگەڵ ئەمریکا و ئیسرائیل بەڵام خاڵە هاوبەشەکانى دەستنیشاننەکرد.

هه‌روه‌ها وتى “ئه‌و تۆمه‌ته‌ هەر بۆ پەژاک نیە بەڵکو هەر هێزێک نەیارى ئێران بێت مۆرى ئەمریکا و ئیسرائیلى لێدەدرێت، تۆمه‌تى په‌یوه‌ندى له‌گه‌ڵ ئیسرائیل و ئه‌مه‌ریکا بۆ موسەوى و خاتەمى کوڕانى خۆشەویستى ئیمام خومەینیش دروستکرا”.

حاجى ئەحمدى سەبارەت بەو تۆمەتانەى ئێران بۆ پژاکى دروست دەکات دەڵێت “ئێران ئامانجى ترى هەیە وەکو ئەوەى دەیەوێت بەتورکیا بڵێت ئەوە ووڵاتانى ئەوروپا هاوکارییان بۆ دروستکردنى کوردستان دەیەوێت ووڵاتانى ئیسلامى لەبەرامبەرى ئێمە ڕاست بکاتەوە بۆ ئەوەى دژایەتیمان بکەن بەڵام زۆربەى ووڵاتانى ئیسلامى دژى ئەمریکا وئیسرائیل نین”.

سەرۆکى پژاک سەرسوڕمانى خۆى نیشاندا لەوەى کەپژاک لەلیستى ڕەشى تیرۆرى وەزارەتى خەزێنەدارى ئەمریکادایە، وتى “ئه‌گه‌ر وایه‌ ئه‌مه‌ریکا چۆن دەتوانێت هاوکارى پژاک بکات”.