هاوکات ئه‌مڕۆ پۆلیسی تورکیا دووجار هه‌ڵیانکوتاوه‌ته‌سه‌ر ماڵی له‌یلا زانا ئه‌ندام په‌رله‌مانی‌ تورکیا به‌مه‌به‌ستی ده‌ستگیرکردنی، به‌ڵام ناوبراو نه‌که‌وتۆته‌ ده‌ست هێزه‌کانی‌ تورکیا.

والی‌ زۆرێک له‌ شاره‌کانی‌ تورکیا له‌وانه‌ (ئه‌سته‌مبوڵ، دیاربه‌کر، وان، ماردین، سێرت، ئورفا، مێرسین و باتمان) فه‌رمانیان ده‌رکردووه‌ بۆ ده‌ستگیرکردنی‌ چالاکوانانی‌ کورد و ئه‌ندامانی‌ (BDP).

له‌شاری‌ سێرتیش هێرش کراوه‌ته‌ سه‌ر سه‌رۆکی شاره‌وانی‌ ئه‌و شاره‌ (سه‌لیم ساداک) به‌ڵام ناوبراو پێشتر ئاگاداری ئه‌وه‌بووه‌ که‌هێرشی‌ ده‌کرێته‌ سه‌ر.

سه‌لیم ساداک به‌سایتی‌ هاوڵاتی وت”ماوه‌یه‌که‌ ده‌وله‌تی‌ ئه‌که‌په‌ ده‌یه‌وێت کوردان زیاتر بخاته‌ نێو زیندانه‌کانه‌وه‌، چونکه‌ کورد به‌راستی‌ ئه‌و کاره‌سات و کۆمه‌ڵکوژیه‌ی‌ که‌ ده‌وڵه‌ت له‌ شرناخ ئه‌نجامیداوه‌ قبوڵ ناکات، هه‌رئه‌وه‌ش وایکردوه‌ که‌ زه‌خت بخاته‌ سه‌رچالاکوانان و گه‌نجانی‌ کورد بۆئه‌وه‌ی‌ کارو چالاکی‌ دژی‌ ده‌وڵه‌ت ئه‌نجام نه‌ده‌ن”.

هاوکات سایتی رۆژنامه‌ی‌ توده‌ی‌ زه‌مان بڵاویکرده‌وه‌ که‌ سه‌رله‌به‌یانی ئه‌مڕۆ (هه‌ینی)، پۆلیسی تورکیا هه‌ڵی کوتاوه‌ته‌سه‌ر چه‌ند شوێنێکی‌ جیاجیا له‌ ۱۶ پارێزگای‌ ئه‌و وڵاته‌، که‌چه‌ندین باره‌گای پارتی ئاشتی و دیموکراسی (BDP)ی تێدا بووه‌.