نیویۆرک تایمز ناسنامه‌ی ئه‌م به‌رپرسه‌ی ئاشکرا نه‌کردووه‌، به‌ڵام نوسیویه‌تی که‌ ئه‌وان به‌ رابه‌ری ئێرانیان وتووه‌ که‌ گه‌روی هۆرمز، هێڵی سوره‌ که‌ ئه‌گه‌ر ئێران ئه‌وه‌ ببه‌زێنێت، روبه‌ڕوی کاردانه‌وه‌ی ئه‌مریکا ده‌بێته‌وه‌.
به‌رپرسه‌ ئه‌مریکییه‌کان، شێوه‌ی سازدانی ئه‌م په‌یوه‌ندییه‌ نائاساییه‌یان رون نه‌کردووه‌ته‌وه‌ و نه‌یانوتووه‌ که‌ ئایا وه‌ڵامێکیان له‌ ئێران وه‌رگرتووه‌ته‌وه‌ یان نا.
به‌رپرسانی ئه‌مریکی پێشتریش به‌ ئاشکرا رایانگه‌یاندبوو که‌ هه‌وڵدانی ئێران بۆ داخستنی گه‌ڕوی هۆرمز ته‌حه‌مول ناکه‌ن. ژنه‌ڕاڵ (مارتین دێمپسی)، سه‌رۆک‌ئه‌رکانی سوپای ئه‌مریکا له‌م دواییانه‌ وتویه‌تی که‌ له‌ دۆخی داخستنی گه‌روی هۆرمز له‌ لایه‌ن ئێرانه‌وه‌، “ئه‌مریکا دێته‌ مه‌یدانه‌وه‌ و گه‌روه‌که‌ ده‌کاته‌وه‌”.

ئه‌م قسانه‌ له‌ دوای ئه‌وه‌ دێت که‌ به‌رپرسانی سه‌ربازی و سیاسی ئێران له‌ هه‌فته‌کانی پێشوودا، به‌ جاران باسیان له‌ هێزی ئێران کردووه‌ بۆ داخستنی گه‌روی هۆرمز به‌ڕوی کشتییه‌ بازرگانی و نه‌وتکێشه‌کان.